المساعد الشخصي الرقمي

مشاهدة الإصدار الكامل : علي بن سالمـ الكعبي


ناصر الغاوي
24-01-09, 05:30 PM
( عقد فيروز )
للشاعر علي بن سالم الكعبي
في
العاطفة
والحب
والوصف والجمال
2007

اهداب عينك ( 1 )

حرف القصيده داعب أهداب عينك = والشعر سطره يذهله ورد خدّك
الحسن كنّه يا الغلا في يمينك = خذته وفصّلته ولبسته بقدّك

وردك جذبني وشاقني ياسمينك = وحالي حيا من شمة انفاس وردك
الشمس يسطع نورها من جبينك = وْيا ويل قلبي من رياحين رندك

لا شلّك الله زيّن الأرض زينك = شلّيت قلبي يا شذا الزهر عندك
دامت ليالي السعد بيني وبينك = ويسقى الزمان اللي جمعنا بودّك

الله على خدك وجيدك ولينك = وسبحان من بالذوق والطيب بدك
إشبك يديني يا الغلا في يدينك = وغذّ المولّع من ينابيع شهدك


تدلل ( 2 )


تدلل بين ربّات الجمالـي = جميل ولايقٍ فيـك التدلـل
اسطّر لك من الإحساس غالي = وسحرك مع نبض قلبي تسلل
تدلل دام في عمرك مجالي = قبل ريف الصبا يا زين يذبل
بقنّد لك من ْحروفي دلالـي = وأنفاسي لها نيران تشعل
تميزت ْبجمالٍ مع دلالي = تهبّل تجذب أوصافك تهبّل
تساوي الشرق وجنوب وشمالي = وغرب وكل هذا الكون واسأل
شعاع الفجر ونجوم الليالي = وشوقٍ شط ما خذني ْبتمهّل
ببرق الخد وعيونٍ ثلالي = وسهم الرمش لب القلب يدخل
شربت المر من بعد الزلالي = وفي بعدك خفى روحي تزلزل
أرى اللي غيركم وهمٍ ولالي = وعيني اْلزينهم يا زين تجهل



غلاكم ( 3 )


يا حلوها الدنيا معاكم = مثل السحاب وبارد الميْ
تتبسم أيامي برضاكم = وبدونكم ما كنّها شيْ

أرتاح إن صفيت سماكم = وكان التكدّر أنكوِي كيْ
يروي عروقي عذب ماكم = وانا بكم في عالمي حيْ

الطف من النسمه هواكم = وانتوا النعيم وبارد الفيْ
متمكن بْقلبي غلاكم = يروي شرايين الجسد ريْ

إنجوم متعلي فضاكم = أنوار ليلي بالدجى ضيْ
من هو بها الدنيا شراكم = وفراقكم يلوي الحشا ليْ

فجر الأنوار ( 4 )

عاهدتني بالحب توفي = مهما إبعدتني عنك الأقدار
وقدّرت لو عاندك ظرفي = وحفظت رسمي وْياك تذكار

سلبتني بالحاظ طرفي = واشعلت في خفّاقي النار
في بحر عينك ضاع حرفي = وشعري بنعس عْيونك احتار

إن سار جفن العين يغفي = طيفك لفى بالشوق زوّار
من يوم كفّك ضم كفّي = أوفيت لك يا فجر الأنوار

يســــــأل ( 5 )

يسألني يسأل ودّنا وين = في القلب ولاَ في الحنايا
وهو الذي مسكَنْه في العين = وفي الروح وبكل الزوايا

مخزون حبّه في الشرايين = وحده ولا غيره معايا
متبادلين الود قلبين = وقلوبنا كانت هدايا

على مدار أيام وسنين = أذكره في صبحي ومسايا
وافي معه بالعسر واللين = ومخلّد اسمه في الحنايا


أنت السبب ( 6 )

أنت السبب لا تخبّر والسبب منّك = شوقك وذوقك وحلو النطق بلسانك
فني تشربك بغض الود مع فنك = وسحبك سقتها بنفّات من مْزانك

يفداك عمري وكل سنيني يفدنك = يا من بطيب الموده مالت أغصانك
أرويت قلبي وعيني بحسن مغرنك = جيدٍ وخدٍ ورمش ونظرة أعيانك

الشعر يقصدك قصده بالحسن ظنك = واسراج خيوله ومضمونه على شانك
لانّي أودك وأنت تودني لانّك = وخيول فكري سرت في أرض ميدانك

فكري سرابي بكل الشوق ناصنك = يا مالك القلب وسط الروح عنوانك



يا زهـــره ( 7 )


يا مرحبا يا ناعم الصوت والعود = أحيا بصوتك يوم هاتفك جاني
يا بو عيون مدعجه والهدب سود = لاحظ عيانك بالموده رماني

خذت الجمال ومالك السحر ع الخود = يالسولعي يا ريم عين الدماني
بسمتك تفرح خاطري وانت مفنود = بالزين يا سيد الحسن والمعاني

إنته لقلبي راحته وانت مقصود = حظّي تبسّم يوم ربّي عطاني
نلتك وناولتك من الحب عنقود = يا زهرةٍ متمايله في المغاني




حيّاك ربي ( 8 )

حيّاك ربّي يا ضيا الدار حيّاك = حيّاك من ساق الغيوم وْجلبّها
سبحان من ثبّت على الأرض موطاك = وانت الثريّا بالمعاني نسبها

الحمد لله ردّك بخير لحماك = يا جوهره لون الذهب من ذهبّها
يا من كسر نور الثريا ثرياك = واسرار وصفك عجّزت من طلبها

لي مر في عتم اليالي محيّاك = تكشف سواد استارها من هدبها
سار القلم حشمه على نهج ممشاك = ترقى لك حروفي وتشكي تعبها

يا عاليٍ قدر ومكانه فـ دنياك = يفداك من صاغ الحروف وْكتبّها

حبيب الروح ( 9 )

تخليني بخليات الليالي = ثريا ليلنا وتقسى عليه
وتحسبني من الاحساس خالي = وانا كلي أحاسيسٍ نديه

لها في خافقي منزال عالي = ومحبتها كوت لفواد كيه
وأنا لولا اداري للمقالي = لنادي بودهم صبح وعشيه

حبيب الروح لو تعلم بحالي = وتدري بالخوافي الداخليه
سرى ودك بدمي ولا يزالي = ملكني ملك سلطاته قويه

حقيقه وغيرها بالعين لا لي = غديرٍ ولا لما هم بالسويه
يا ليلي لا ليه فيهم ولا لي = صواب اللي لوت لفواد ليه



يا غالي ( 10 )


ناداك قلبي ليش ما رديت = وانته سمعت الصوت يا غالي
الرمش شل الروح ما سمّيت = جرّيتني جرّات لحبالي

دلّه من الشعر لك صفّيت = فنجانها بالشوق يصفالي
خطّيت شعر الود لك خطّيت = لعيونكم لبيات تنقالي

فوق الطبيعه نورك تْعدّيت = عذب الكلام وْنغمك زْلالي
هنّيتني بالود وتْهنّيت = وقتك صفا والوقت يصفالي

سهّرت عيني بك وانت غضّيت = يا محدّب الرمشين بظلالي
سلّيت سيفك بالنظر سلّيت = صوّبتني من حد قتالي

في بحر عينك ( 11 )

في بحر عينك من هدبها مسايير = سود الرموش اللي تعّدل مزاجي
للشوق معنى والمودّه تعابير = نظراتها فيها شقا وانفراجي

معيار حبك من تقيسه معايير = هجرك أسى وشوفك دواي وْعلاجي
في بعدكم نيرانروحي مساعير = وقلّبي تكسّر مثل كسر الزجاجي

من حبكم أرسم جميل التصاوير = وفكري سرى مع معتمات الدياجي
عندي مميز عن جميع الغنادير = وفي غيبتك أعلن عظيم إحتجاجي





الخد الخجول ( 12 )

لاذ عني يوم قربت أدركه = فز كنه ذلك الظبي الجفول
سهم رمشه في خفوقي شربكه = لو بغى غيره يطاول ما يطول

عاود اللفته يناظر مهلكه = نظرةٍ خلّتني بحالة ذهول
لو عقدت العزم ناوي أشبكه = ما قدرت إلا على حسب الأصول

قمت أعصر فكر راسي واحبكه = كيف أوصل بارق الخد الخجول
كفّي بكفّي أردّه وافركه = عقلي الميدان وافكاري تصول

بين فكر وقلب دارت معركه = فكر هادي يعسف القلب العجول
ما قويت اسرج فؤادي واتركه = عازم ابقى لو مقانيصه تطول



نور شمس ( 13 )

نور شمس وبدر وبروقي = في ظلام الليل براقه
ساقني له بالهوى شوقي = عذب ودّه خافقي ساقه

مثل حر يرضّف التوقي = قلبيا والنفس تواقه
به جمال وحسنٍ وذوقي = عين ريم ورمش واعناقه

والمحيا بان بشروقي = مثل صبح تنفّس اشراقه
إن رمس يسلبك منطوقي = كيف قلبي صوتهم طاقه

مثل العسل ( 14 )

مثل العسل وسط الضماير غلاكم = وانتو عـسل كل الليالي والايام
جر القلم بالشوق خطه جداكم = حبره محبه وصورته فكر والهام

نوفي ولكن ما نوصل وفاكم = الكم وفا ومنك الوفا ياخذ أحكام
مزن بروقه لا ضيات بهاواكم = نجم فريد بلمعـته وسط الاجرام

نقشت انا ودي بصفحة سماكم = وبدم بقلبي صارت تخط الاقلام
فكري سـرى بلهفه وغيومه تباكم = تمطر علـيكم اطيب حروف وانغام

لاعاش شعر في حروفه جفاكم = ولاعاش عمر ما قضى بحبك أعوام

يا بحــــــــر ( 15 )

يا بحر أنا بسألك عن مبعد الدار = يا اللي من الأشواق مبرد وخالي
أنت طويت بلجتك علم وأسرار = وانا طرالي من الهوى ما طرالي

عودت لي من ماضي الوقت تذكار = تذكار خل أبعدته الليالي
باسباب ظرفٍ حط في خافقي نار = سوى لهبها داخل القلب صالي

يا ليت يدري ناعس الطرف وش صار = إن كان ما خلاني بجو خالي
لأنه يعرف إني من الناس ما اختار = غيره ولا أبدل سواهم بدالي

ليته نشد عن حالتي وتجيه الأخبار = ويشوف مضنون الحشا كيف حالي
هو نور عيني والغلا وزهوة الدار = في بعدهم ضاق الفضا والمجالي




يا الجــــاني ( 16 )

هذا جزى الي لعينك تسهر عيونه = ترميه بالهجر يا فتان العياني
يرعى ودادك ووده ما تراعونه = عذبت قلبه عليك الله يالجاني

سود الليالي يمرن ما تلاقونه = ما تدري ان المعنّى بات ولهاني
جسر المحبه حبيبي لا تهدونه = خلّوه موصول بين القلب والثاني
الحر نفسه عزيزه لا تذلّونه = حتى ولو زاد نبض الحر ما لاني
وقلب عايش قربكم حرام ترموهنه = من دون نظره بلا عطفِ واحساني
وانا يا عيوني بكم يا زين مفتونه = عافت على بعدكم نومها الهاني


أخيرا جيت ( 17 )


أخيرا جيت وش حالك حبيبي = وش أخبارك وقلبك وش علومه
بعدني فيه يا أنسى وطيبي = غرامه فرحه ومصدر همومه

احبك يا عسى تبقى نصيبي = وأبادلك الغلا والله يدومه
ربيع العمر يا الزين العجيبي = ترا روحي بلياكم ْمحرومه

اذا شفتك انا وقتي يطيبي = بصبحى والمسى ولحظات يومه
بلفتاتك ونظراتك عجيبي = وقلبي لا خفق محدٍ يلومه

طليبك وانت في الدنيا طليبي = وذوقي صعب ما غيرك يرومه
غزيت وْخذت لي قلبي نهيبي = قمر دنياي والباقي نجومه


حياتي ( 18 )

التفت يا حبيبي = عننا لا تغيبي
يا حياتي ونصيبي = العمر لك هديه

أنت وجدي وشوقي = صوبكم دوم توقي
ودكم في عروقي = ساري الود فيه

كم لكم سرت عاني = وإن فرقتك أعاني
أشتقي في زماني = وإنت رحمه عليّه

شف قلبي بشفّك = واحتويته بكفّك
زينٍ وحسن حفّك = يالزهور النديه

جنّتي ويا عذابي = فيكم القلب ذابي
صوبكم كم سعابي =وردّت الروح حيّه

موّطنك في وطنّا = بهجةٍ في زمنّا
الغصن لك تثنّى = والنسايم عذيّه


حلو الوصايف ( 19 )


سلام الله على حسنك و زينك = لدين العود و خدودٍ رهايف
يغار الفجر من طلعة جبينك = وغار الليل من شعرٍ رضايف

و أنا أغار من عيني لعينك = اذا تنظر بعين الشوق شايف
ومن شعرك إذا لامس يمينك = ومن شرتا النسيم إن جاك رايف

رياح الورد من ريحة خنينك = عقيد السولعي قدت الولايف
بأخلاقك و اوصافك و لينك = ملكت القلب يا حلو الوصايف

دمجنا الود ما بيني و بينك = بيَدك الحكم و احكم بالنصايف
ترفق وارحم الي ما يهينك = و لو بسمه نديه من الشفايف

حبيب الروح من عينك زبينك = ومن لحظة فتون العين خايف


نار الأشافي ( 20 )


صوابي من لظى نار الأشافي = ودرّ كالبرد والبرق رفّي
ورمش شل قلبي باحترافي = ووردٍ من صنوف الحسن لفّي

وبرقٍ بين سحّابٍ ارضافي = سقى وردٍ من النفّات نفّي
تقاسمنا رحيق الود صافي = شفاني بشوفته روحي وشفّي

اذا ما بيننا صار اختلافي = خطير العقل من بعده يخفّي
يصيب القلب في بعده ارتجافي = واحط من الألم ع الصدر كفّي

لهم بمشي على النيران حافي = ورمضا القيظ لو ريقي يجفّي
ليالي البعد والفرقا عجافي = وحالي من جوى الليعات خفّي

عقد فيروز ( 21 )

الثوب الأخضر خالطه نور الألماس = حول رْقبتها ينتثر عقد فيروز
والساعة الألماس بذراع حساس = تلمع شرى ذراعٍ من الماس مفروز

ودرز الحجول التف للرسغ حرّاس = وفي كفّها زين المخاليق محجوز
كم ماسةٍ في ثوبها تخلب الراس = متماسكه من فوق حوزٍ من الجوز

والعقد الأزرق قال للجيد لا باس = فيروز عقدٍ لامع بْجيد له روز
ما مثلها بين البشر سحر واحساس = تدخل وتقفل مدخل القلب برموز

تنثر رذاذ الطيب لي هب نسناس = سحرٍ على انفاس المخاليق مدزوز
مع كل هذا وجهها نجم الأدماس = إشعاع نور بمهجة الليل مركوز
ورمشٍ على الخافق رمى سهم الأقواس = يجرح ويسلب بس أنا عنه ماجوز
حلو العيون اللي لها اهداب انعاس = تمهر خفايا القلب بالود مدروز

خذتي هواهم عن هوى جملة الناس = في نبض قلبي سيدي ماخذ الفوز
ربي يحرسه شر وسواس خناس = محروز عن درب المطافيق محروز


حلو التدلل ( 22 )

وين يا حلو التدلل والحلاه = طاري بطاريك ع الخاطر طرى
لانّك بدنياي ينبوع الحياه = لك غلا مع نبضة النبضه سرى

أغلي بشوقي وخفّاقي غلاه = ودك اللي في شراييني جرى
يا غناتي انت لي سعد وغناه = مغتني وللغير عيني ما ترى

لو نواني الغير قلبي ما نواه = من ملك شرواك ما ينظر ورى
من ثراك الزين راسك منتهاه = لك غلا من هامتي حتى الثرى

الخبر انته وانته مبتداه = والشعر لو حاز وصفك ينقرا
والله إن القلب حبك من خفاه = والعذول بسر حبك ما درى


مقبله ( 23 )


مقبله تمشي ويتبعها الفضــول = تحضن أطراف الجدايل شيلها
في لسان الحال نظرتها تقول = مرحبا بحر المشاعر سيلها

واثقه في مشيها مثل الخيول = ما تعبر كل حي بجيلها
التدلل مع خطا الخطوة خجول = رايقه كن السحاب يشيلها

بدر من شافه خطر يغدي مْهبول = والقوافي اسرجت له خيلها
تايهه الاشعار في عرضٍ وطول = حايره فالوصف تشكي ويلها

هب حسن فيها ابد هولٍ و هول = من شعرها لين وطيةْ ريلها
برق خده في دجى ليله يصول = والشّعر ماخذ سواده ليلهــا


غزال العين ( 24 )


يا غزال العين عينك تسلبي = ناعسه في لحظها المخطر سؤال
رمشها باعصاب قلبي يلعبي = في ضلوعي مثل مسنون النبال

في بحرها ضايعٍ مع مركبي = تايهٍ تعصف بي رياح الشمال
حرف شعري في بحرها سار بي = يطلب رضاها عسى ينال المنال

من العين وساكنه في بوظبي = زينها ثابت ولا فيه احتمال
من فصيله نادره هذا الظبي = فيه عنوان المحاسن والجمال
ظبي في فيضاه يازي يعربي = بين حاجر صخرها وطوق الرمال
حارت حروف الشعر شو تكتبي = في الظبي لي ما مثل عينه مثال


الهنوف ( 25 )

صغت عقدٍ نادرٍ غالي الوصوف = لأجل مزيونه ملكني لطفها
الهنوف اللي بها تحلا الحروف = إن نقشنا وصفها في حرفها

لو تريد تْوفي حقوق الهنوف = تعجز حروفي توفّي وصفها
حلوة المنطق بمنطقها لطوف = اللآلي من ثغرها تزفها

هلت الأشواق من قلب شغوف = تكتب حروفي درر في شفّها
حايرٍ ورد الربيع اللي يشوف = الحسن من طرفها الى طرفها

بين راسه وقاعة اقدامه صنوف = الجمال بكل زينه زفها
يا حروفي عانقي الوجه اللطوف = وقبّلي لي يا حروفي كفها

للقلب ناس ( 26 )

لالا تحاول تملك القلب لالا = للقلب ناس بطيبهم يملكونه
فيهم من صْنوف الحسن والدلالا = والقلب في كف الغلا يدللونه

غالين ما تركو لقلبي مجالا = كل يوم باصناف الدلع يكسبونه
والغير لال وهم لقلبي زلالا = فرات عذب بسحرهم يمزجونه

الحب لوّل الوفا له كمالا = ودّه سرى بالدم ما يدركونه
أجوَد من الجيون عجيب الجمالا = حصباه في عمق البحور مْخزونه

من نسمة النادي يصيبه جفالا = يطرد رضايا لو بغوا يطردونه
أسأل وعني في غيابي يسالا = ولا بيّح بشوقه ولو يسألونه

لالا تحاول من محال المحالا = أحول عن حلوٍ .. نواعس عيونه




كنت أظن ( 27 )
مثل نور الشمس في طي السحاب = اختلط لون الغروب بْنورها
الندى والزهر فوق الخد ذاب = خالط النور الخجول زْهورها

وامتزج في كفها النادي الخضاب = مخملي الكف ضم عطورها
إن مشى ذك القدم فوق التراب = تكتسي بثوب ربيع برورها

شاربه كاس الدلع أحلى شراب = رقة الإحساس فيض شعورها
في مشيها في نظرها والاهداب = في ولعها في شموخ غرورها

كنها زهرٍ زها فوق الهضاب = والسحايب ضمته بمطورها
كنت أظن انه خيالٍ أو سراب = لين بيّن عن يميني حضورها

الحرف العنيد ( 28)
ارقصي مع نبض قلبي والقصيد = وداعبي بحر الشعر قبل الرقاد
بالانامل طوّعي الحرف العنيد = وارسميه بلوحة حروف الوداد

حرف ينبع من خفوقي للوريد = ينسج الاحساس مع خط المداد
ينثني له رمش عن عيني بعيد = رمش سارق من دجى اليل السواد

ظلّل عيونٍ لها لحظٍ فريد = ناعساتٍ كن يغشاها النواد
إن نظرت الحسنها شوقي يزيد = وكان تبعد الوله والشوق زاد

جرّني برق النحر والجيد جيد = الدماني لي على المشراف عاد
لجلها ولعيونها صغت الجديد = والحروف استسلمت عقب العناد

نســـايم ( 29 )

يا غزالٍ في ربا داري تربّا = نادرٍ في روض خفّاقي يربّي
من مقيله فز يوم الريف هبّا = ذايرٍ من نسمته ريف المهبّي

عاد لفتاته بعينٍ ما تغبا = رمشها الساحر دخل قلبي وربّي
له فؤادي يوم عاد اللفت لبى = ولاجل غيره حالفٍ لي ما يلبّي
إن فرقته خافقي بالآه شبا = ونبض قلبي من عظيم الوجد شبّي
وفي لسان الحال قال القلب تبا = للظروف اللي تفرقني وحبّي

وإن لفاني فايضٍ شوقٍ وحبا = التقيته بفرحة القلب المحبّي
فرحتي بشوفة عيونه ما تخبا = هو هنا عمري وآلامي وطبي





عونـــــك ( 30 )
طالبك لا تغرق دموعك عيونك = قرّب فديتك بمسح الدمع تكفا
أنا الذي من بدة الخلق عونك = إذا تكدر جوك إشلون بصفا

لا تسمح لبعض العرب يحزنونك = وانا معك كل الصعيبات ترفا
يا من لمع نور الدموع بجفونك = وبرق الأمل مع جارف الدمع رفا

قلبي كما طيرٍ ملاذه غصونك = وفكري بعالم دنيتك كمَ غفّا
تعزف على دقّات قلبي لحونك = وغلاف قلبي لعزف للحان دفّا

شو تقول ي عاقلٍ فتنته بجنونك = عقله ثقيل وباع عقله وخفّا
العشق مابه نقد واحسن ظنونك = مرفوعة الأقلام والبحر جفّا

يرحم الله والديك ( 31 )

ما بقالي قلب يتحمل جفاك = كل ما أبعدت يتولّه عليك
أعطني وصلك مثل مالله عطاك = من جميع الخلق وحدك مشتريك

يا شبيهٍ للثريا في علاك = طال صبري يرحم الله والديك
وين ما تمشي مشى قلبي وراك = يتبع دروبك ونبضه يحتريك

فاق كل أريام جيلك مستواك = واخجلت كل الشفا من شفّتيك
سعد من هو يقضي أيامه معاك = وإن زعل منّك لنفسك يشتكيك

لو سألت عروق قلبي عن غلاك = جاوبتك القلب كله في يديك
ما حلا هز الخفوق الا حلاك = أشهد انه رابحٍ من يهتويك

لو يطول الوقت نفسي في رجاك = حايز الوجدان ما عندك شريك

دخيلك ( 32 )

دخيلك خفّي اعتابك بنظره كلّمي عيوني = أريد الشوق بعيونك يشوف الشوق في عيني
ترى موج الوله فيها جرفني حيل مجنوني = أشير أشواق مجنونه فراقك حطّها فيني

ولَوني ما احتمل نظرو عيون برمش مسنوني = سرى سمّه بوجداني وعايش في شراييني
ولكن لاجل ما أرضي فضولك واشطب ظنوني = تدور بخاطرك حاضر لو النظرات تدميني

ولا قد كان بالإمكان كاين كان في كوني = يكون بمثل ما كنتِ كيان بكل تكويني
ولو قالوا كذا كاني ترا ما كان مكنوني = بكامن كامن المكنون كيّه كم يكويني

ولو قلتِ لي أكوني لعينك كلّي أكوني = شسوّي وقلبي وروحي تسير بكيف تبغيني
وأنتِ ومني ومنك أنا يا در مخزوني = وتبّت إيد من يسعى يفرق بينك وبيني


لكـــن ( 33 )

للنبض عشره والقلوب إيتشاكن = قلبي لقلبك يشتكي ضيق واحزان
من غيبتك ضــاقت بلاد واماكن = ماكن لي ديره ومسكنوعنوان

أقـــلامي الجــزلى عليك يتــــباكن = من كثر ما خطيت ضلع القلم بان
أخفت شعاع الشمس والجــو داكن = شخصي على شوفة محياك ولهان

الناس من حــــولي كثيرين لكن = وقف على لكن تعرف الذي كان
محدٍ وفــا لك مــثل قـلـــبي ولا كن = كثر الذي كنه من أعتاب واشجان

العمر يجري وان سكن فيه ساكن = لابد ما يرحل ورى حدود الأزمان
دنياك ما تسوى وكم حي ما كن = فيها تمكن وقت واصبح خبر كان

جرب على كيفك جميع المساكن = مالك سوى قلبي على الأرض مسكان

الدلع ( 34 )

بك دلال يجنن وطيبك شذا = والخجل واضح على الخد الندي
وإن سألت تقول أنا طبعي كذا = انولد كل الدلع مع مولدي

خفة الدمع الدلع منّي خذا = ولي بغى التجديد عني ينشدي
وانت تبغي يا علي تبعد لذا = مع دلالي جت حروف الأبجدي

حار هذا الحرف من ذلك لذا = والجمل تحتار شو به تبتدي
سارت حروفي تباري بالحذا = والأسد برجٍ كله برج الجدي

في حياتي أوكسجيني والغذا = ونور عيني بالظلام السرمدي
موتي فراقك وصوتك منقذا = وبدلالك هم صدري يبعدي




مشفي جروحي ( 35 )

وين أنت يا مشفي جروحي = يا من بوسط القلب حليـت
لو كنت تعلم كثـر نوحـي = ما كنـت يالغالـي تغليـت

ان كان لك قلبٍ سموحـي = وعهود حبي ما تناسيـت
ماكنت تتركنـي وتروحـي = ارجع ترى لك في الحشا بيت

اهـواك وبحبـي ابوحـي = واعشق دلالك لو تماديـت
وانا لك محـبٍ نصوحـي = مهما تباعـدت وتخليـت

اشتاق لك شوقٍ جموحـي = يا من على قلبـي توليـت
ياحلم عمري ويا طموحـي = يا حبـي وكل مـا تمنيـت

افرح اذا طيفـك يلوحـي = في خاطري او يوم مريـت
يتعانقن روحـك وروحـي = واهيم بك لي مـن تباديـت


شوق ومناجاه ( 36 )

صوتك إحساس وهمس شوق ومناجاه = وفي نبرته عطف وحنين وغرابه
حسّيت به بحّة ألم في خفاياه = وشعور قاصد خافقي واحتفابه

صوتٍ خفق له جوف قلبي ولباه = وغيره خفوقي صوتهم ما درابه
لطف وحنان الود بالهمس محلاه = الصدر ضمه بالغرام وسرابه

حسّي وفكري مع خيالي تمناه = الفكر هام وجو همسه غدابه
طواني بموجه وروى مهجتي ماه = والتف قلبي في نعومة سحابه

يشكي لي هموم الزمن واترجاه = يشل عن صدره غبار الكآبه
بعيد عني ومبعدٍ عنه واهواه = وقريب منه وخافقي ما سخابه


العهـــد ( 37 )

يا شوق قلبٍ يشيل الحب وشلونه = عساه بعده على علمي ويطريني
خايف تكون الليالي شدّت ضعونه = واقفى ولا عاد يذكر ماضي سنيني

تسأل عن الحب وانت الحب وشجونه = تدري غرامك سكن داخل شراييني
قطرات دمي بطعم الحب مشحونه = إن قلت بسكت عزايمها تناديني

يا شوق ياللي بنيت أبيات موزونه = بنشدك عن ثقل حبي في الموازيني
ما يكفي أني حبيب وقلبك يصونه = ودّي تعبّر عن حدود الغلا فيني

والله يا من يحط الكحل بعيونه = ما شافت حدود حبك في الغلا عيني
لاجلك شموليّة الأوزان مطعونه = منها تسيل لبحور ولا تكفّيني

والله أنا أدري بقلبك يعزف فنونه = وادري على اوتار دقاته تغنّيني
لكن طبيعة دلال بطبع مزيونه = أعرف جوابك وأقول شْكثر تغليني

يا زين تامر أنا بأقول لك عونه = لما عنادي عصاك يْطاوعك ليني
واعرف ترى كلمة الأحرار مضمونه = لكن وش اللي ضمن عهد المزاييني

العهد دايم لراعي العهد يعطونه = وانا عطيتك بدال العهد عهديني
قلبٍ ملكته وفكرٍ صرت مخزونه = كلي معك ما سألتك يا الغلا ويني



مشكله ( 38 )

مشكله لي صارت الميزه وضوح = وميزتك يظهر عليك الي حصل
كيف تزعل وانته للبسمه طموح = مايناسب راعي العليا زعــل

كبريائك بلسمن يشفي الجروح = تصدم الي ينصدم بك يا جبل
موقفٍ مـــر وعبــر خله يروح = عادتك تعبر مساحات الجهل

أنت الاكرم لو تسامح يا سموح = عمر قلبك بالسماحه ما بخل
أعرفك خيال للظرف الجموح = فارس الخيل الّجم ْخيول الجدل

النوايف ما تطاولها السطوح = ماعلى وجه البسيطه من كمل

جمر شوقي ( 39 )

جمر شوقي بالصدر هاجي = بالوله والآه ممزوجي
شبّت النيران بدراجي = حرها بالخافق يلوجي

شاعله في ليلي الداجي = ما تطفّي ناري ثْلوجي
إبتسامه منّه علاجي = ورد يانع بين لمروجي

شعره المتموج أمواجي = شل قلبي جاني الموجي
والعيان السود لدعاجي = كن فيها السحر مدروجي

خد فيه النور وهّاجي = والرموش بجيشها فوجي
حطمت يا محمد أبراجي = لي لها بالعالي بروجي

قدرك كبير ( 40 )

قدرك كبير ونفتهم قصد معناك = وانته ربيع العمر ربي يصونك
ما مر يوم إلا حبيبي ذكرناك = ومترى الليالي ما تساوي بدونك

يا فجر يا شمس الضحى بدر بضياك = ولطياب ينفح عطرها من متونك
لا تظننا مع ضجة الناس ننساك = شجوننا مترابطه مع شجونك

أحلى الليالي عندنا يوم شفناك = وانته ثريا الليل ينور بلونك
عرفتنا واحنا بلطفك عرفناك = وكانك زقرت نْقول بالعون عونك

يا نسمة تْعطّر شذا الورد دنياك = يا جوهر الغواص ما يلحقونك
عشقت دنيانا وياكثر نهواك = ونحب من هم عندنا يذكرونك

سحابةٍ عذب المطر في حناياك = بالغيث تمطرنا سواري مزونك
ما مر يومٍ ما عبر همس طرياك = تسلم وتسلم لي لواحظ عيونك


هاجــس ( 41 )

تدرين من انتي أميره للاحساس = وانا العنيد اللي ملكتي شعوره
ما يوم قلبي لان مع كثرة الناس = وامسى خفوقي من سببك بخطوره

من يومها بالراس عشرين هوجاس = والحين مافي خاطري غير صوره
يا حاكمٍ سيطر نفوذه على الراس = اخذي فؤادي واسهري في سطوره

من غيرك اللي بالغلا تاخذ الكاس = وتفوز من جبر الخفوق وكسوره
إنتي حضورك بالبشر مثل لالماس = امن المعادن شي ثاني حضوره

أهديت لك شعري من امواج لانفاس = ترسي على شاطي أمانك بحوره
يا نظرةٍ ينفذ سهمها بلا قياس = لحظك تسرّب بالشرايين نوره


الظروف ( 42 )

أبعدتني ظروفي والظروف ابعدتكم = ولا انا لو بشوري كل وقتي معاكم
وان جفتكم ظروفي مهجتي ما جفتكم = ولو جفتني ظروفك اعرف اني وياكم

انتوا الحب الأول والمحبّه انصفتكم = والهوى ما صفى لو ما صفالي هواكم
كل وقتي تغيّر يوم روحي هوتكم = وانتو الحس كله والشعور اهتواكم

كم ليله تعذب ما نهل من نهلكم = بات عطشان ظامي ما وصل عذب ماكم
وغصب عنها الظروف أحبكم وأحلف ابكم = وكم حلفتو براس دوم فكره جداكم

وكان رفتوا عليّ يا الغلا من مهلكم = بحلف برب خالق كل كوني غلاكم
انتو دقات قلبي ما تحمل غضبكم = لو زعلتني الليالي الرضا من رضاكم

جسم الروح ( 43 )

كيف جسم الروح عن روحه يروح = كيف أبعد عنه واصبر يا حمد
كل جرحٍ ضاعفه أربع جروح = كل همٍ عود يلقا له ولد

من شبيه اصبح واشعاع الوضوح = تقعد الشمس بْسماها لي قعد
ليت يا ابن سهيل لو نلت الطموح = كان رمشة عين وارجع للبلد

عطره اللي في هوى بلادي يفوح = إن تنفسته معه ضلعي صعد

يهزمني انتصاري ( 44 )

كفى يا صقر في صدري توارى = تهز الضلع في جول الحباري
ما دام القلب والفكر يْتبارى = على الحالين يهزمني انتصاري

رعاك الله يا تاج العذارى = صهرتيني وانا صعب انصهاري
اداري شي واشيا ما تدارى = فضحني فيك شوقي وانبهاري

تخيرتك تعب صعب يْتجارى = وانا قد التفرد باختياري
هدبك اللي شرى سيوف النصارى = عليها قسوة العصر الحضاري

وانا باسمي كما جيش الغيارى = حسمت الأمر واعلنت الطواري
سلام الله يا شمس النهاري = على كبد السما شبّت عصاري

الوقت ما لوّن ( 45 )

الوقت ما لوّن عزيزين الاشناب = وهو الخبير اللي طوى الناس طيّا
عشته ووجهي واحد بكل الاهداب = ماني من اللي كل يوم بْمحيّا

يا من غلاكم ضارب بصدري اطناب = شد الحبال من العروق وتفيا
لي قلب ماله يوم درتوبه أبواب = أرميه لو للّي يباه ايتهيا

مجلس لمن يحفظ خويّه اذا غاب = مملوك للي قدرهم في الثريا
يعمي الزمان إن غيّر قلوب الأصحاب = كانه لقى ممشاه فيكم وفيّا

نصحى ونرفى ونتغطى لك اعتاب = إن ما سمعنا همس صوتك وحيّا
من انقلوا لك انقلوا فيك باسهاب = وسمعي عن اصوات الحواسيد عيا

واسمع لظى انفاسك اذا يوم تنصاب = وانته هناك وصوت آهك هنيّا
هذا العتب كله يبا روس الاسباب = حي الضمير اللي بداخلك حيّا

صوتك عن اسماعي مدى الوقت ما غاب = يا ذا العزيز اللي للعيون ضيّا
كيف يتحاسب من له حقوق وحساب = وغيابكم ري المعاليق ريا

بنلوّمك واللوم لضلوع الانساب = ما يصلح التقصير لاهل الحميا



جمع وتقديمـ : اخوكمـ : ( ناصر الغاوي )

راعي الجيــــب
24-01-09, 09:05 PM
الشاعر المتألق : ناصر الغاوي

وضعت لنا هنا درر كما هو اسم القسم .. الوزير علي سالم عبيد بن ونيس الكعبي

من الشعراء الممزين في الدولة .

لقد قدمت له صنيع خير تشكر يالشاعر عليه من كريم لمستحق . ويستاهل بومنصور ..

ولكننا لا نغفل عن عتابك ياناصر .. ابطيت علينا يالشاعر ،، وفي انتظارك بفارغ الصبر

مع التحية

راعي الجيــــب

محمد الزعابي
24-01-09, 11:19 PM
يعطيك العافيه

علي بن سالم بن ونيس

شاعر بن جعب ... بيض الله ويهه و ويهك على النقل المميز

ناصر الغاوي
10-02-09, 09:39 PM
الشاعر المتألق : ناصر الغاوي

وضعت لنا هنا درر كما هو اسم القسم .. الوزير علي سالم عبيد بن ونيس الكعبي

من الشعراء الممزين في الدولة .

لقد قدمت له صنيع خير تشكر يالشاعر عليه من كريم لمستحق . ويستاهل بومنصور ..

ولكننا لا نغفل عن عتابك ياناصر .. ابطيت علينا يالشاعر ،، وفي انتظارك بفارغ الصبر

مع التحية

راعي الجيــــب

الله لا هن اشراقتك الجميله بن خلف
دايم الحضور في كل الاوقات


وارجو السموحه على قل حضوري
وان شاء الله بحاول اتواصل معكم في هالايام القادمه



دمت بخير

خانتني دموعي
14-02-09, 04:50 PM
مشكووووووووووور ع الطرح
وصح لسانه بن ونيس

ناصر الغاوي
20-02-09, 08:56 PM
يعطيك العافيه

علي بن سالم بن ونيس

شاعر بن جعب ... بيض الله ويهه و ويهك على النقل المميز

الله يعافيك

الشاعر

( محمد الزعابي )

شاعر بحجم بن ونيس يستاهل أن نهتم باشعاره
دمت بخير